कान्तिपुर संवाददाता
दिनहुँ बढ्दै गइरहेको हिंसात्मक घटनाको त्रासले चित्रकलालाई पनि प्रभाव पारेको छ । अनिसा महर्जनको चित्रमार्फत अहिलेको अवस्थामाथि व्यंग्य कसेकी छन् । पाटनस्थित क्लासिक ग्यालरीमा जारी प्रदर्शनीमा उनको ‘प्रोटेक्सन’ शीर्षकको चित्र सजिएको छ, जहाँ एउटी बालिका पछाडि हतियार लिएर हिँडदै छन् ।
ग्यालरीमा अनिसासहित पाँच महिला चित्रकारका सिर्जना छन् । ‘सदन’ शीर्षकको प्रदर्शनीमा उनीहरूले आआफ्ना अनुभूति क्यानभासमा साटेका छन् । अनिसाले हिंसात्मक बन्दै गएको समाजमा छोरीहरू कसरी सुरक्षित हुने ? भन्ने त्रासपूर्ण मनोदशा क्यानभासमा उतारेकी छन् । उनका क्यानभासमा दु:खी कुमारीदेखि संस्कृतिको बहानामा बाँधिएका महिला चरित्रसम्म छन् ।
चित्रकार सरिता डंगोलका सिर्जना पुरानै सिरिजअन्तर्गत छन् । पछिल्लो समय काइँयोको विम्बमार्फत उनले महिला र पुरुषको सम्बन्ध देखाउँदै आएकी छन् । यस पटक पनि उनले त्यसै गरेकी छन् । प्रेम, विछोड, निराशा, खुसी, मनमुटावजस्ता अनेक मनोदशाबाट गुज्रिएका जोडीको मनोभाव उनका चित्रमा देख्न पाइन्छ । सबै चित्रमा सम्बन्धलाई जोड्न भने उनले काइँयोकै प्रयोग गरेकी छन् । अनामिका गौतमले नारी सशक्तीकरणको भाव रंगमा पोख्ने जर्मको गरेकी छन् ।
‘एड्जस्टमेन्ट टिल व्हेन ?’ थिममा सिर्जित उनका चित्रले पीडितले शासकीयको मनोमानी कहिलेसम्म सहने भन्ने भाव बोकेका छन् । नेपाली पेपरलाई क्यानभासमा सिधै टेक्स्चर गरेर अनामिकाले प्रस्तुति माध्यममा नौलो काम स्वाद दिएकी छन् । अर्की चित्रकार दीपमाला महर्जनले सेतो, रातो, पहेँलो, हरियो र नीलो रंगमा न्युड फिमेल फिगर उतारेकी छन् । एउटै न्युड शरीरमा फरकफरक रंगका माध्यमबाट भिन्नाभिन्नै मनोविज्ञान सिर्जिएकी छन् उनले ।
नम्रता सिंहको चित्रमा चाहिँ प्रेम र सद्भावको भाव झल्किन्छ । तराई परिवेशका महिला आकृति एवं बुट्टा उतारेकी उनले चम्किलो रंग प्रयोग गरेकी छन् । तर, महिलाको आँखामा देखिने निराशा, वेदना र मौनताले थुप्रै गुनासा पोखेजस्तै महसुस हुन्छ ।
‘साइलेन्ट लभ’ शीर्षकको चित्रमा उनले प्रेममा महिलाको स्थानमाथि व्यंग्य कसेकी छन् । मिथिला समाजमा महिला प्रकृतिप्रेमी हुन्छन् र उनीहरू मौन भई प्रेम गर्छन् भन्ने भाव चित्रले खुलाउँछ । हाँसको चुचोमा कमलको फूल हेर्दै घुम्टोभित्र लजाएकी महिला आकृतिले मैथिली नारी मनोविज्ञानको संकेत गर्छ ।
प्रदर्शनी बुधबारसम्म चल्नेछ । प्रकाशित : आश्विन १०, २०७५ १२:११
