चेर्दुङको चियो
फोटो
जति उकालो बाटो आउँछ उति नै रमाइलो । चराचुरुङ्गीहरूको धुन । चौरीको बथान । सेल रोटीझैं फन्को मारेको हिमशृङ्खला । रंगीबिरङ्गी गुराँस फूलले वनै ढाकेको । दोलखाको गौरीशंकर गाउँपालिका वडा नं. ४ झ्याँकुबाट छहारे गुफा र चेर्दुङडाँडामा पुग्न एक दिन पूरै खर्चिनुपर्छ ।
बिहान ६ बजे झिसमिसमै बाटो तताएपछि दिउसो ३–४ बजे मात्र छहारे गुफा
पुगिन्छ । झ्याँकु ४ मा अवस्थित छहारे गुफा अहिलेसम्म धेरै मानिस नपुगेको ठाउँ हो । जंगलमाझ रहेको यस गुफाको आफ्नै इतिहास,
कहानी छ । सयौ वर्षअघि लामाहरू गाउँमा अशान्ति,
झैझगडा, आपतविपत आउँदा यस गुफामा ध्यान गर्न बस्ने
गरेको मानिन्छ । असिना पानी रोक्न,
रोगव्याधि हटाउन र शान्तिको सन्देश प्रवाह गर्न महिनौंसम्म
लामाहरूले यहाँ ध्यान गर्ने गरेको स्थानीय लामा रिन्जिपासाङ शेर्पा बताउँछन् ।
३२ सय मिटर उचाइमा
अवस्थित छहारे गुफाबाट चेर्दुङ पुग्न २ घण्टा अझ समय लाग्छ । उकालै उकालो लागेपछि ३७ सय मिटरको उचाइमा अवस्थित चेर्दुङको सुन्दरताले आँखा चिम्लिनै गाह्रो हुन्छ । दोलखाको अधिकांश भूभाग यसै चेर्दुङबाट नियाल्न सकिन्छ । गौरीशंकर हिमाल हातैले छुन भ्याइन्छ कि जस्तो लाग्छ । दोलखाका प्रशिद्ध
स्थलहरू कालिञ्चोक, हनुमन्तेडाँडा, चरिकोट
बजार, विगु गुम्बा यहाँबाट सहजै नियाल्न सकिन्छ । गौरीशंकर गाउँपालिका वडा नम्बर ४ मा रहेको यस चेर्दुङमा महादेवको दर्शन गर्न वर्षको भदौ महिनामा ठूलो मेला लाग्छ ।
महादेवको दर्शन गर्दा गाईबस्तुमा कुनै रोग नलाग्ने र बस्तुभाउ
गोठभरि हुने जनविश्वास छ । यसैले गोठालेहरू भैंसी,
गाई, चौरी, भेडाको
आवाजमा गाईबस्तु माग्दै यहाँ पुग्ने गर्छन् । चेर्दुङको डाँडामा मात्र रूख उम्रेको छैन । २ सय मिटर वरिपरि घना जंगले ढाकेको छ । यहाँ प्राय सधैंभरि हिउँ पर्ने गर्छ । यहाँ हिउँ परेको चरिकोट
सदरमुकामबाट सहजै देख्न सकिन्छ । मोटरबाटो यहाँसम्म नपुगेकै कारण पर्यटकको संख्यामा कमी आएको छ । यहाँ प्राय वनभोज खान र हिउँ खेल्न युवाहरू पुग्ने गर्छन् ।
प्रकाशित : जेष्ठ २५, २०७६
११:२५
